ഇന്ത്യയുടെ പല ഭാഗങ്ങളിലും താപനില കുതിച്ചുയരുന്നതിനിടെ, ഉത്തർപ്രദേശിലെ ലഖ്‌നൗവിൽ വിചിത്രമായ ഒരു മോഷണ സംഭവം പുറത്തു വരുന്നു. പലരീതിയിലും കള്ളന്മാർ കുടുങ്ങുന്നത് കണ്ടിട്ടുണ്ടെങ്കിലും ഇത്തരം ഒരു സംഭവം ഇത് ആദ്യമായിരിക്കും എന്നാണ് നെറ്റിസണ്സ് പറയുന്നത്.
ഒരു കള്ളന് പറ്റിയ അബദ്ധമാണിത്. മോഷ്ടിക്കാൻ കയറിയ വീട്ടിൽ എസി ഉണ്ടെന്ന് കണ്ടതോടെ കള്ളന്റെ മനസ്സിൽ കുളിർമഴ വീണു. കനത്ത ചൂടായതിനാൽ എസി ഒക്കെ ഓണാക്കി പതിയെ മോഷണം നടത്തുന്നതിനിടെയാണ് മദ്യം കണ്ണിൽപ്പെട്ടത്. ഇതോടെ കാര്യങ്ങൾ കൈവിട്ടു.
മൂക്കറ്റം മദ്യപിച്ച് എസിയും ഓണാക്കി കട്ടിലിൽ മൂടിപ്പുതച്ച് ഒറ്റ ഉറക്കം. ലഖ്‌നൗവിലെ ഇന്ദിരാനഗർ ഏരിയയിൽ ഞായറാഴ്ച പുലർച്ചെയാണ് സംഭവം അരങ്ങേറിയതെന്ന് റിപ്പോർട്ടുകൾ പറയുന്നു . വീട് ആളൊഴിഞ്ഞതായി കണ്ട മോഷ്ടാവ് വിലപിടിപ്പുള്ള സാധനങ്ങൾ മോഷ്ടിച്ച് എസി ഓണാക്കി വിശ്രമിക്കുകയായിരുന്നു.
സമയത്താണ് വീടിന്റെ മുൻവശത്തെ ഗേറ്റ് തുറന്നിരിക്കുന്നത് കണ്ട് അയൽവാസികൾ വാരണാസിയിലുള്ള വീടിൻ്റെ ഉടമയെ വിളിച്ചത്. ഉടമ ഒട്ടും വൈകാതെ പോലീസിനെയും വിളിച്ചു. പോലീസ് വീട്ടിലെത്തി എസി മുറിയിൽ ഉറങ്ങിക്കിടക്കുന്ന മോഷ്ടാവിനെ കണ്ടെത്തി.
വൈറലായ ഫോട്ടോയിൽ കള്ളൻ ഉറങ്ങുന്നതും വലതു കൈയിൽ മൊബൈൽ ഫോണും പിടിച്ചിരിക്കുന്നതും കാണാം. പോലീസ് മോഷ്ടാവിനെ അറസ്റ്റ് ചെയ്യുകയും ഐപിസി സെക്ഷൻ 379 എ പ്രകാരം കേസെടുകുകയും ചെയ്തു.
