ചവറ: പൊലീസ് ഉദ്യോഗസ്ഥരെ ആക്രമിച്ച യുവാക്കൾ പൊലീസ് പിടിയിൽ. ചവറ വട്ടത്തറ ശാന്തിഭവനത്തിൽ ആകാശ്(26), വട്ടത്തറ പുത്തൻവീട്ടിൽ പ്രമോദ് (25) എന്നിവരാണ് അറസ്റ്റിലായത്. ചവറ പൊലീസാണ് പിടികൂടിയത്.
കഴിഞ്ഞ ദിവസം രാത്രി എട്ടോടെയാണ് സംഭവം. ശങ്കരമംഗലം ഗ്രാന്‍റ് സൂപ്പർ മാർക്കറ്റിന് മുന്നിൽ പൊതുജനങ്ങൾക്ക് ബുദ്ധിമുട്ടുണ്ടാക്കുന്ന രീതിയിൽ പെരുമാറിയ സംഘത്തെ പിരിച്ചുവിടാനെത്തിയ പൊലീസ് ഉദ്യോഗസ്ഥരെയാണ് യുവാക്കൾ അസഭ്യം പറഞ്ഞ് ആക്രമിച്ചത്.
വിവരമറിഞ്ഞ് സ്റ്റേഷൻ ഇൻസ്പെക്ടറുടെ നേതൃത്വത്തിൽ കൂടുതൽ പൊലീസ് സംഘം സ്ഥലത്തെത്തി രണ്ട് പേരെ പിടികൂടുകയായിരുന്നു. മറ്റു രണ്ട് പേർ ഓടി രക്ഷപ്പെട്ടു. പിടിയിലായ ഒന്നാം പ്രതി പ്രമോദിനെതിരെ മൂന്ന് നരഹത്യാശ്രമം, മാരകായുധം ഉപയോഗിച്ച് മാരകമായി പരിക്കേൽപ്പിക്കൽ, മാനഭംഗപ്പെടുത്തൽ, അക്രമം തുടങ്ങിയ വകുപ്പുകളിൽ അഞ്ചോളം കേസുകൾ നിലവിലുണ്ട്.
മറ്റു പ്രതികൾ ഉടൻ പിടിയിലാകുമെന്ന് പൊലീസ് അറിയിച്ചു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
